Kryetari i AAK-së, Ramush Haradinaj, ka reaguar ashpër ndaj fitores së Albin Kurtit, duke deklaruar se një rezultat i tillë nuk është në të mirë të Kosovës. Sipas Haradinajt, me fitorën e Kurtit përfitojnë ata që, siç u shpreh ai, janë armiq të shtetit të Kosovës.
Në një deklaratë publike, Haradinaj theksoi se qasja politike e Kurtit ka dëmtuar raportet e Kosovës me aleatët ndërkombëtarë dhe ka krijuar tensione të panevojshme, duke dobësuar pozitën e vendit në arenën ndërkombëtare. Ai shtoi se politika përçarëse dhe konfliktuale nuk i shërben interesit shtetëror dhe as qytetarëve të Kosovës.
“Kur Kosova izolohet dhe humb mbështetjen e miqve të saj, atëherë kjo i shkon për shtati atyre që nuk ia duan të mirën vendit tonë,” u shpreh Haradinaj, duke nënvizuar nevojën për unitet politik dhe bashkëpunim me partnerët strategjikë.
Deklarata e Haradinajt ka nxitur reagime të ndryshme në opinionin publik dhe në skenën politike, ndërsa pritet që debatet mes pozitës dhe opozitës të intensifikohen edhe më tej pas këtij zhvillimi.
